PUAMA SEBELUM TIDUR
Den sang allo na lambi’ kapariuan tu umanna ambe’na Dalana’. Ma’kadami Dalana’ lako ambe’na, “O ambe’, la dipariumo tu umanta sambali’. Masiangpa ku male untambai to muane pariu sambali’ umanta.” Na kuami ambe’na mebali, “Iamo ke, pebudai tu to muane la pariu.” Nakuami Dalana’, “ Ko tunuammi bai sia pebudai tu bo’bo’ minasu masiang”.Masiangna to, malemi te Dalana’ unggaraga tau-tau (payo-payo), na pebudai tonganni na osokki sambali’ umanna. Nasuami ambe’na Dalana’ tu tau mantunu bai sia na pebudai tu bo’bo’ na nasu. Ia tonna manasumo tu pa’piong sia bo’bo’, malemi tu to baine parundun sola Dalana’. Ia tonna lambi’mi tu salu, dolomi te Dalana’ lamban lian biring salu. Apa ia tonna lanmo tangnga salu, mengguntu’mi ade’ tu Dalana’ sae lako angge barangkangna tu uai salu. Ma’kadami lako to parundun nakua, “Mandalan te salu. Tiroi mai, angge barangkangku tonganmo tu uai salu. Aku bang mora male parundun.” Mataku’mi ade’ te to baine la parundun na ben bangmi mintu’ kande lako Dalana’, na Dalana’ tu male parundun.
Ia ade’ tonna rampomo langngan lantang tu Dalana’, na rampunmi tu tau-tau na osokki ma’talimbung dio biring lantang sia male duka untambai solana ungkandei tu bo’bo’ sia duku’ bai. Ia tonna tiromi to parundun kumua budamo tau sambali’ lantang kumande, sulemi ade’ te to parundun. Tonna rampo langngan banuanna ambe’na Dalana’, nakutanaimi ade’ ambe’na Dalana’ tu to parundun nakua, “O..mi sule kale’ ora parundun?”. Mebalimi ade’ te to parundun nakua, “Saba’ tu uai salu diong na tang ki sara la lamban. Dalana’ manna tu bisa lamban lian, dadi Dalana’ tu male parundun. Sambali’ sia tu to pariu untalimbungngi lantang kumande.”
Tallung allo ade’ nanai Dalana’ umpakena ambe’na…………
Ia tonna ma’ tallung allonamo to, malemi ade’ ambe’na sia indo’na Dalana’ untiro umanna. Apako tae’ bangpa tu uma mangka dipariu. Ma’kadami ade’ Dalana’, “Ko kariuanmo tu uma, la disalaga pole’ omo. Alangki’ tedong masiang na disalaga te umanta.”
Masiangna to, malemi te Dalana’ unnala tedongna ambe’na na baai lian umanna. Rampo sambali’ umanna to, na alami tu bulu-bulu induk na palangnganni boko’ tedongna. Nadurrui’ api tu bulu induk na lussu’ ade’ tu tedong. Sulemi sambali’ banuanna tu Dalana’ na ma’kada tu Dalana’ lako ambe’na nakua, “Tae’ na mangka tu uma di pariu belanna lussu’ tu tedong. Masiangpa ku male pole’ untambai tau.”
Masaingna to malemi te Dalana’ untambai siulu’na sia sangmanena untundui pariu. Belanna manarang te Dalana’ unnala penaanna sia attana to mangngura, budami ade’ tu tau la male untundui pariu masiang. Ma’kadami lako ambe’na te Dalana’ nakua, “La pariuki’ masiang, pebudai tu bo’bo’ sia tunuangki’ tu bai belanna buda liu tu tau la pariu masiang.” Masiangna to, rampo nasangmi ade’ te sangmanena Dalana’ pariu sambali’ umanna. Malemi tu tau parundun na undi te ambe’na sia indo’na Dalana’ untiroi tu umanna. Lendu’ masannang tongan penaanna untiroi tu tau buda pariu dio to’ umanna belanna manarang te Dalana’ unnala penaanna sangmanena. Sae lako mangka te umanna ambe’na Dalana’.
Sia manarangnamo te Dalana’ unnala penaanna tau, la to muane, la to baine….
Nalambi’ la ditanannimo pare te umanna Dalana’, malemi ade’ Dalana’ untambai to baine la mantanan pare. Belanna manarang unnala penaanna tau te Dalana’, buda liu tu to baine untundui male mantanan pare.
Dimangkai ade’ tu umanna ambe’na Dalana’ ditananni.
……Na lambi’mo attunna tau mepare……..
Pantan meparemi ade’ tu tau umpeparei umanna. Na dikutui’ sia ditambak. Mangka to di alloi sae lako marangke. Marangke to, dipekissinmi tama alang tu pare marangke.
Ia duka te alangna Dalana’ lan tangnga-tangnga alangna tau. Ma’tangnga’mi ade’ Dalana’ umba nakuanni na bisa ponno pare tu alangna. Ma’kadami ade’ te Dalana’ lako mintu’ tau sia ambe’na tu unnampui alang untalimbungngi alangna Dalana’ nakua, “La kuballa api te alangku belanna tae’ sia pare dao.” Nakuami tau mebali, “Da’ dikka’ muballai api tu alangmu belanna napurai duka api dako’ tu alangki. Ki peponnoi mira resa’ langngan tu alangmu.” Pantan rampomi ade’ tu tau umpekissin pare sae lako ponno tu alangna Dalana’. Ko patalo tangnga’ omo tu Dalana’ to.
